Ավարտական երեկոյի դիմահարդարում

Ավարտական երեկոն յուրաքանչյուր աղջկա համար կյանքի ամենից սպասված եւ յուրահատուկ օրերից է: Անհրաժեշտ է դրան պատրաստվել հիմնավորապես՝ մտածելով կերպարի յուրաքանչյուր մանրուքի մասին: NEWS.am STYLE-ը որոշեց դիմահարդարման գաղտնիքներով օգնել այն ընթերցողներին, ովքեր արդեն սկսել են պատրաստվել այդ անմոռանալի երեկոյին:

Հիշե՛ք. ճիշտ դիմահարդարման դեպքում պետք է հաշվի առնել զգեստի գույնը, ինչպես նաեւ ձեւը: Դիմահարդարումը չպետք է շատ վառ եւ հանդուգն լինի: Հարկավոր է շեշտադրել կա՛մ աչքերը, կա՛մ շուրթերը: Կարեւոր դեր է խաղում նաեւ հոնքերի ձեւն ու թարթիչների երկարությունը: Եթե դրանք շատ խիտ են, ապա անհրաժեշտ է շեշտադրել արդեն շուրթերը:

Այս իրադարձության համար առավել արդիական է բնական դիմահարդարումը, քանի որ այն կընդգծի ձեր պատանեկան գեղեցկությունը: Ձեզ անհրաժեշտ են տոնային կրեմ՝ դեմքի թերությունները ծածկելու համար, եթե այդպիսիք կան, սեւաներկ, սնգույր՝ դժգունության էֆեկտից խուսափելու համար, շրթներկ (այն կարող է լինել վառ, եթե աչքերին ստվերաներկ չեք քսել): Կարող եք նաեւ շուրթերն ընդգծել շրթներկի գույնին համապատասխան մատիտով:

Եվ այսպես՝ գործի անցնենք:

Քայլ 1-ին – դեմքի երանգ

Չմոռանաք, որ տոնային կրեմի գույնը պետք է առավելագույնս մոտ լինի ձեր մաշկի գույնին, հակառակ դեպքում դեմքի եւ պարանոցի գույների տարբերությունը տհաճորեն աչքի կզարնի: Խաղարկեք երանգները: Նախ կրեմը քսեք ամբողջ դեմքին, հետո ավելի մուգ տոնային կրեմով պատեք կզակն ու այտոսկրերը: Այդ կերպ դեմքն ավելի արտահայտիչ է դառնում: Չմոռանաք դիմափոշու մասին: Ավելի լավ է օգտագործել փխրուն դիմափոշի, որը մաշկին թավշե տեսք կտա:

Քայլ 2-րդ – աչքերի հարդարում

Հարկավոր է հաշվի առնել ձեր հագուստի, աչքերի եւ մազերի գույնը: Շագանակագույն աչքերով թխահերների աչքերի հարդարումը պետք է ավելի վառ լինի: Իսկ եթե ձեր աչքերը երկնագույն են, կանաչ կամ մոխրագույն, իսկ վարսերը՝ խարտյաշ, ապա կարող եք օգտագործել ավելի մուգ երանգներ:

Քայլ 3-րդ – թարթիչներ

Սեւաներկը քսում ենք՝ չմոռանալով նախապես սանրել թարթիչները: Սեւաներկը քսելուց հետո եւս մեկ անգամ թարթիչները սանրում ենք՝ ավելորդ գնդիկները հեռացնելու համար:

Քայլ 4-րդ – սնգույր

Սնգույրը կարող է լինել տոնային կրեմից մեկ երանգով ավելի մուգ: Քսում ենք լայն վրձինով:

Քայլ 5-րդ – շրթներկ

Եվս մեկ անգամ նշենք, որ հարկավոր է շեշտադրել կա՛մ աչքերը, կա՛մ շուրթերը: Շուրթերը շեշտադրելու համար հարկավոր է օգտագործել վառ գույներ: Իսկ եթե առանձնացրել եք աչքերը, ապա փայլ քսեք, ցանկալի է՝ թափանցիկ:

Հարցեր, պատասխաններ, մեկնաբանություններ